De Beachdrëf war fir mech perséinlech ee ganz groussen Erfolleg! Vun Ufank u, war et net einfach jiddereen z’iwwerzeegen an derzou ze kréien matzemaachen, mee mat der Zäit sinn ech ëmmer méi op Ënnerstëtzung getraff a firun allem Feedback vu Jonken dee mech immens gefreet hunn.
Iwwer gutt zwou Wochen konnte mir iwwer 1000 Visiteure begréissen déi quasi all ganz zefridde waren mat allem wat mir organiséiert hunn, a firun allem hu mer gesinn wéi positiv esou ee Projet fir d’Communautéit ka sinn: Sport, Gesondheet, Inklusioun, Bénévolat an nach vill méi.
Natierlech wier dëst guer net méiglech gewiescht ouni déi vill Ënnerstëtzung vun der Gemeng a vun der Jugendkommissioun, virun allem dem Frank Conrad an dem Laurence Gengler-Valmorbida, an et wier och net ënnert där Form méiglech gewiescht ouni di vill Hëllef vu Jonken a Jonk-Bliwwenen.
Esou Projeten si menger Meenung no essentiel fir ee gutt zesumme Liewen, an hëllefen eis di nächst Generatiounen ze stäerken!
An engem Gemengerot géif ech meng Roll gesinn esou Projeten weider ze droen an z’ënnerstëtzen, ouni awer op ee Format ze bestoen. Wann d’Formule Beachdref weider gewënscht ass vun der Communautéit, fueren ech natiirlech gäeren domadde weider, mee wann aner Iddien a Wënsch opkommen, sinn ech gäre Bereed mech och fir déi anzesetzen: fir di Jonk, fir jiddereen!
